नागपूर येथे संताजी ब्रिगेड तेली समाज महासभा आणि जवाहर विद्यार्थी गृह यांच्या संयुक्त विद्यमाने 10 मे ते 18 मे 2025 या कालावधीत "एक पाऊल पुढे: भीष्मकालीन संस्कार शिबीर 2025" आयोजित करण्यात आले. या शिबिराचा समारोप आनंदोत्सवात आणि उत्साहपूर्ण वातावरणात संपन्न झाला. या शिबिरात मुलांना जीवनमूल्ये, पर्यावरण जागृती आणि सांस्कृतिक शिक्षण देण्यावर विशेष भर देण्यात आला. शिबिराच्या समारोप समारंभाला प्रमुख पाहुणे म्हणून नागपूरचे अपर पोलिस आयुक्त श्री. संजय पाटील उपस्थित होते, तर विशेष पाहुणे म्हणून श्री. श्रीकांत गभणे, प्रादेशिक व्यवस्थापक, परिवहन विभाग महाराष्ट्र, तसेच संताजी ब्रिगेडचे अध्यक्ष श्री. विजय भाऊ हटवार आणि श्री. जितूजी गोल्हर यांनी कार्यक्रमाला उपस्थिती लावली.

     शिबिराचे आयोजन श्री. अजय धोपटे यांनी केले, तर डॉ. दीपा हटवार यांनी शिबिर प्रमुख आणि श्री. सुनिल मनापुरे यांनी सहप्रमुख म्हणून जबाबदारी सांभाळली. शिबिरात मुलांना पर्यावरण संरक्षणासाठी सीड बॉल तयार करण्याचे प्रशिक्षण, लाठी-काठी प्रशिक्षण, म्युझिक योग, योगासने, आर्ट अँड क्राफ्ट, बालकथा, गाणी, खेळ आणि मातृ-पितृ पूजनासारख्या विविध उपक्रमांचा समावेश होता. या उपक्रमांमुळे मुलांमध्ये सांस्कृतिक मूल्यांचा आणि पर्यावरणाविषयी जागरूकतेचा संदेश प्रभावीपणे पोहोचला.

     शिबिराच्या यशस्वीतेसाठी कविता रेवतकर, राजेश हटवार, कपिल डांगरे, चंदू वैद्य, राजेश झाडे, विनोद मानकर, शुभांगी डांगरे, मोना वैरागडे, रजनी वैरागडे, प्रणिता वैरागडे आणि सीमा वैद्य यांनी मोलाचे योगदान दिले. त्यांच्या सहकार्यामुळे हे शिबीर मुलांसाठी एक अविस्मरणीय अनुभव ठरले. समारोप समारंभात मुलांनी आपल्या सादरीकरणांनी उपस्थितांचे मन जिंकले आणि शिबिराच्या यशस्वी आयोजनाबद्दल सर्वांनी आयोजकांचे कौतुक केले.